कइसे मितान

कइसे मितान

लागत हे नवा साल म
आही नवा बिहान
काहत हे हमर मुखिया सियान-
सुनव जी अफसर!धरव धियान!!
नवा उदीम बर ईनाम मनमाने
नइते तुम जानो अउ तुंहर काम जाने
एसो बिकास के रद्दा नवा गढना हे
सब ल संग लेके बस आगू बढना हे!
सियान के बात ल अफसर
धरही कनो समझके गियान
बनिहार हाँसही अउ गाही किसान!!
सिरतो काहत  हंव न!!!
कइसे मितान?

कइसे मितान

#समाजवादी झगरा#

बड दिन ले माते हे
बाप अउ बेटा म झगरा
चुनाव बताही
कोन हावय तगडा!!
फेर ओकर ले पहिली
हावै एकठन जंजाल
कोन मिलही आखिर
सइकिल निसान!!!
एकझन पइडिल मारथे त
सइकिल बने चलथे
दुझन के पइडिल मरइ म
चलइय्या मन मुडभरसा गिरथे!
अतेक छोटे बात के
जेमन ल नइहे गियान
तें मन कइसे जितही?
कइसे बनाही सरकार??
जनता ह भोकवाय हे
देखके उंकर घमासान
सिरतो काहत हंव न !!
कइसे मितान??

कइसे मितान

#फौजी के पीरा#

एक झन फौजी ह
अपन दुख ल गोहराये हे
कतिक तकलीफ म रिथे ओमन
सगरो देश ल बताये हे
कतिक बिपत म हावे
हमर देश के जवान!
पीरा ल गोहराथे त
कोनो नइ देवय धियान
बडे अफसर मन करथे मनमानी
छोटे कतको सच्चा राहय
नी चलय सियानी
अब तो सरकार ल लेय बर परही संज्ञान
बने जेवन करके डिप्टी करे हमर देश के जवान!!
फेर फौजी ल अनुशासन के
रखना चाही धियान
काबर कि उंकरे से जुडे हे
हमर देश के सम्मान
सिरतो काहत हंव न !!
कइसे मितान??
*रीझे-टेंगनाबासा(छुरा)*