बेटी अवतार ले

           !! १ !!
तोर चिन्हा बन के आवंव,
तैं सुन, मोरो गोहार ले..।
घर के, तुलसी मैं कहावंव,
मोला कोरा म, उतार ले..।

तोर बगिया म, फूले राहंव..।
मैं जग म, नाव बगरावंव,
दाई तैं अपन बेटी ल,
दुनिया म, अवतार ले......। २
            तैं सून, मोरो गोहार ले...। २

            !! २ !!
तोर दुलवरिन बन के आवंव,
तैं सून, मोरो गोहार ले..।
घर के लछ्मी, मैं कहावंव,
मोला बांही म, पोटार ले..।

तोर अंगना म, खेले हावंव..।
मैं कभू नाक नई कटावंव।
ददा तैं अपन बेटी ल,
गोदी म,बईठार ले........। २
               तैं सून, मोरो गोहार ले...। २

             !! ३ !!
तोर बर राखी धर के आवंव,
तैं सून, मोरो गोहार ले..।
आंसू बन के, मैं बोहावंव,
मोर डोली ल,...निहार ले..।

तोर संग म, पले हावंव..।
मैं बड़, भागमानी कहावंव,
भाई तैं अपन बहिनी ल,
थोकन, दुलार ले........। २
               तैं सून, मोरो गोहार ले...। २

ललित साहू "जख्मी" छुरा
जिला - गरियाबंद (छ.ग.)