छत्तीसगढ़ बिक्कट खुस हे

गाँव-गली,खेत-खार
नंदिया-नरवा,तरिया पार
इस्कूल-कालेज अउ मैदान
बारी-बियारा,खेंरखाडांर
हाट-बजार,रद्दा-बाट
गऊरा-चौंरा,मंदिर के आंट
मसानगंज ले बरछाबारी
जगा बदलथे आरी-पारी
सब जगा इंकर पहुंच हे
एक रु.डिस्पोजल,दू रु.पानी पाऊच
पाँच रु.के चखना म
छत्तीसगढिया बिक्कट खुस हे!!

छट्ठी-बरही,पूजा-पाठ
बर-बिहाव,मांदी-भात
मरनी-हरनी,मेला-मडई
पिकनिक,पार्टी,जात्रा-पूजई
सांसद,बिधायक से लेके
पंच के चुनई तक
आखरी बेवस्था महुंवा के जूस हे
एक रु डिस्पोजल,दू रु पानी पाऊच
पाँच रु के चखना म छत्तीसगढिया बिक्कट खुस हे!!

ददा,बबा,कका,ममा
लकठा-दूरिहा के जम्मो सगा
सारा-भांटो,मीत-मितान
अरोसी-परोसी,चिन-पहिचान
घराती-बराती अऊ बजनिया
दारु खोजथे सरी मंझनिया
बस अतकीच दुख हे
एक रु डिस्पोजल,दू रु पानी पाऊच
पाँच रु के चखना में
छत्तीसगढिया बिक्कट खुस हे!!

रीझे यादव
टेंगनाबासा(छुरा)