अईसन छत्तीसगढ़ हे मोर

अईसन छत्तीसगढ़ हे मोर ...२
आदि -अनादि काल ले जेकर
   उड़त हावय सोर ...२ अईसन छत्तीसगढ़
१.
एकर महिमा में का बखानव
मोरतधज के नगरी हे ,
अत्रि ,श्रृंगी अउ बाल्मीकि के
छछले ज्ञान के गगरी हे ...२
संत भूमि ये छत्तीसगढ़ हा $$  २
सत के करे अंजोर ....अईसन
२.
कोसल के परताप ला देखव
महकोसल ये कहाये हे ,
राजिम लोचन ,कमल क्षेत्र ल
  कोख अपन सिरजाये हे ...२
पुन्य भूमि जिन्हा लव कुश जन्मे $$..२
कौशिल्या के ललोर ....अईसन
३.
सिरपुर ,भोरमदेव ,आरंग हर
  स्वाभिमान छत्तीसगढ़ के
अरपा ,पैरी ,महानदी हा
  जिनगी हे छत्तीसगढ़ के ....२
भेलई ,कोरबा ,बैलाडीला $$ हे ...२
एखर बहाँ सजोर ....अईसन छत्तीसगढ़...

रचना - धनराज साहू, बागबाहरा (छ.ग.)